Pòtoprens mèkredi 12 dawout 2020.-: Biwo Sekretè Deta Alfabetizasyon reyalize yon misyon nan depatman Latibonit, sòti 6 pou rive 9 dawout 2020 an, nan lide pou ranfòse sistèm Alfabetizasyon an nan depatman an.
Sekretè Deta Alfabetizasyon an, Mesye Hervé Saintilus, ki te gen ak li yon delegasyon, rankontre divès otorite ak anpil lòt pèsonaj enpòtan nan sektè Alfabetizasyon an .
Sekretè deta a te rankotre plizyè manb nan sektè relijye a nan depatman Latibonit. Evèk legliz katolik la Monseyè Yves Marie Péan, bat bravo pou inisyativ la, epi pwofite pwomèt akopayman legliz katolik nan gwo kanpay Alfabetizasyon ke biwo Sekrèta Deta a pral lanse a. Legliz batis, legliz nazareyen, legliz advantis poun site sa yo sèlman nan sektè pwotestan an di yo prè pou kolabore ak Biwo Sekretè Deta Alfabetizasyon an.
John Kelly Cenat ki se pòt pawòl Oganizasyon Zantray kap evolye nan sektè vodou a, te pwofite fè revandikasyon vodouyizan pase nan rakont yo te genyen ak Sekretè Deta a. Yon akò patenarya ak Biro Sekretè Deta a, yon politik piblik nan kesyon Alfabetizasyon an epi yon pwogram Alfabetizasyon ki ap dire jiskaske Leta konstate pa gen moun analfabèt ankò, se kèk nan revandikasyon òganizasyon Zantray te fè pase nan rankont sa.
30 jèn ak 5 manb kòdinasyon wo- Latibonit la nan Gonayiv te rive jwen fòmasyon nan men 3 jèn fòmatè Biwo Sekretè Deta a gras ak misyon sa ki gen sipò Gouvènman Jouthe la ak Administrasyon Jovenel Moïse la.
-Fen-
