Pótoprens 26 Janvye 2022.- Minis Nesmy Manigat te chita pale pandan jounen mèkredi 26 janvye a ak kolèg li Listz Quitel, nan ministè Enteryè ak Kolektivite teritoryal yo, sou nesesite pou mete kanpe ankò Komite tematik sou edikasyon ak sanbilizasyon popilasyon an.
Komite sa a gen pou misyon pou itilize tout mwayen ki apwopriye pou ede popilasyon an pi byen prepare pou reyaji fas ak katastwòf natirèl yo. Se nan sans sa, 2 minis yo mete yo dakò pou relanse Komite sa a ki gen ladann reprezantan Ministè Edikasyon nasyonal ak reprezantan Direksyon jeneral Pwoteksyon sivil. Men se minis Edikasyon nasyonal la ak Direktè jeneral Pwoteksyon sivil la k ap prezide nan tèt kole komite sa a.
Jounen sansibilizasyon ak edikasyon nan lekòl yo Kòm aksyon ki ta dwe poze rapid vit, komite deja mete l dakò pou demare ak yon premye jounen sansibilizasyon ak edikasyon sou menas yo : tranblemann tè, siklòn, inondasyon, deboulonnay tè, lanmè monte ak sounami.
Pandan jounen sansibilizasyon sa a, komite a ap genyen pou mobilize brigadye ak volontè pwoteksyon sivil yo, ototorite lokal yo, ajan Kwa Wouj yo yon fason pou mesaj la kapab rive pi byen epi pi vit sou popilasyon an. Komite ap gen pou repete jounen sansibilizasyon ak edikasyon sa a divès kote anndan peyi, sitou nan depatman kote menas tranblemann a, prensipalman, ta parèt pi fò.
Kreyasyon komite sekouris nan lekòl yo
Selon minis Nesmy Manigat, imaj sou fason anpil elèv lekòl te reyaji pandan denye sekous tè a te bay la, montre aklè gen anpil travay ki pou fèt avek elèv, anseyan, men tou avèk tout popilasyon an paske anpil nan yo poko janm metrize ki jès, ki aksyon yo kapab poze pou pwoteje tèt yo epi moun ki ak yo nan moman tè a ta kòmanse tranble.
Nan sans sa, minis Edikasyon nasyonal la defann lide pou chak lekòl genyen yon gwoup sekouris. Daprè minis Manigat, anpil fwa anpil moun pa ta mouri si sila ki te nan anviwonnman yo lè yo gen yon malèz te konnen ki sa pou yo fè pou ede yo.
Kanpay la ta dwe demare anvan lontan
Daprè minis Listz Quitel kanpay sansibilizasyon sa a pa dwe pran tan pou demare. Se yon kanpay ki dwe chita sou tout aspè menas yo. Anplis, li dwe genyen yon dimansyon estratejik ki fasilite tout moun kapab konpran ki sa ki di, ki sa ki pou tèt nan tèl oubyen tèl sikonstans.
Sou bò pa li, direktè jeneral Pwoteksyon sivil la rete kwè gen anpil travay ki pou fèt nan sans sa a. Se poutèt sa li byen akeyi reyaktivasyon Komite sa a.
Doktè Jerry Chandler fè konnen Pwoteksyon sivil gen bon jan materyèl sasibilizasyon li kapab miltipliye pou itilize nan kad kanpay sa a ki dwe fèt toutan paske menas yo toujou la ; menn si selon nati yo, yo kapab pi grav pou yon zòn pase yon lòt.
Komite tematik sou edikasyon ak sansibilisazyon popilasyon an egziste depi lane 2006.
Plan nasyonal jesyon ris ak dezas yo (2019-2030) mete aksan sou enpòtans komite sa ki dwe kòdone tout entèvansyon enstitisyon piblik tankou prive yo ap fè pou ede popilasyon an pi byen reyaji nan moman katastwòf. Nan kad misyon li, li gen pou li travay nan tèt kole avèk medya yo epi lidè kominotè yo.
Biwo kominikasyon
MENFP
